უკრაინა საპარლამენტო-საპრეზიდენტო რესპუბლიკაა.  პრეზიდენტი, იუსტიციის უმაღლესი საბჭოს წარდგინებით, სამივე ინსტანციაში თანამდებობაზე ნიშნავს მოსამართლეებს. თუმცა ამ ეტაპამდე პროცედურა საკმაოდ კომპლექსურია და მასში მონაწილეობს: 

• მოსამართლეთა კვალიფიკაციის უმაღლესი კომისია (HQCJ) და 
• იუსტიციის უმაღლესი საბჭო (HCJ). 

კვალიფიკაციის კომისია უფლებამოსილია მოსამართლეთა კანდიდატების შეფასებასა და შერჩევაზე. საბჭო კი იღებს გადაწყვეტილებას პრეზიდენტისთვის კანდიდატის წარდგენაზე.

2021 წლის საკანონმდებლო ცვლილებებით: 

• კვალიფიკაციის კომისიას (HQCJ) ადგილობრივი და საერთაშორისო ექსპერტებისგან შემდგარი კომისია არჩევს (მინიმუმ 4 წევრი, მათ შორის, 2 საერთაშორისო); 
• შერჩეული კანდიდატების სია კი დასამტკიცებლად იუსტიციის უმაღლეს საბჭოს წარედგინება; 
• თავის მხრივ, იუსტიციის უმაღლესი საბჭოს წევრების პროფესიული ეთიკისა და კეთილსინდისიერების კრიტერიუმებთან შესაბამისობას ახალშექმნილი ეთიკის საბჭო დაადგენს; 
• ეთიკის საბჭო 6 წევრისგან შედგება, მათგან 3-ზე რეკომენდაციას საერთაშორისო ორგანიზაციები გასცემენ. 

ევროკომისია მიიჩნევს, რომ

• ეთიკის საბჭოს ფორმირება მართლმსაჯულების ანგარიშვალდებულებისა და მიუკერძოებლობის მშენებლობის პროცესში მნიშვნელოვანი მოვლენაა;
• ვენეციის კომისიის რეკომენდაციები კანონში სრულად გათვალისწინებული იყო. 

სხვა რეფორმები, რომლებიც უკრაინამ 2014 წლის შემდეგ გაატარა:

• მოქმედი მოსამართლეებისა და პროკურორების შეფასება (examinations, integrity and professionalism check), რასაც სასამართლო კორპუსის მეოთხედზე მეტის, 2 000 მოსამართლისა და თითქმის 12 ათასი პროკურორიდან 30% გათავისუფლება მოჰყვა;
• 2019 წელს უმაღლესი ანტიკორუფციული სასამართლოს შექმნა;
• 2021-2022 წლებში პროკურატურის რეფორმაზე მუშაობა გაგრძელდა.

ევროკომისიის შეფასებით, უკრაინამ დამატებით უნდა იზრუნოს შემდეგზე:

• ვენეციის კომისიის რეკომენდაციების გათვალისწინებით, საკონსტიტუციო სასამართლოს მოსამართლეების შერჩევა კეთილსინდისიერებისა და პროფესიული უნარების საფუძველზე. ამისათვის უნდა მიიღოს და შეასრულოს შესაბამისი კანონმდებლობა; 
• იუსტიციის უმაღლესი საბჭოს (HCJ) წევრობის კანდიდატების კეთილსინდისიერების შემოწმების დასრულება ეთიკის საბჭოს მიერ;  
• საკვალიფიკაციო კომისიის (HQCJ) შექმნისთვის კანდიდატთა არჩევა; 
• სასამართლოს გადატვირთულობის შემცირება;
• მართლმსაჯულების მიმართ ნდობის გაზრდა.

სტატია მომზადდა კომენტარის მიერ USAID სამართლის უზენაესობის პროგრამის მხარდაჭერით. პროგრამას ახორციელებს აღმოსავლეთ-დასავლეთის მართვის ინსტიტუტი (EWMI) ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. სტატიის შინაარსზე სრულად პასუხისმგებელია კომენტარი და მასში გამოთქმული მოსაზრებები შესაძლოა არ ასახავდეს ზემოთ ნახსენები საერთაშორისო ორგანიზაციების შეხედულებებს.