რა უნდა ვიცოდეთ? 

• 2015 წლიდან შრომის უსაფრთხოებას ჯანდაცვის სამინისტროს შრომის პირობების ინსპექტირების დეპარტამენტი ზედამხედველობდა;
• 2020 წელს დეპარტამენტი შრომის ინსპექციის სამსახურის ფორმით ჩამოყალიბდა; 
• 2021 წლის 1 იანვრიდან კი სამსახურს, შრომის უსაფრთხოებასთან ერთად, შრომით უფლებებზე ზედამხედველობის მანდატიც მიენიჭა. 

უკანასკნელი ცვლილება შრომის სფეროში წინგადადგმული ნაბიჯია, ვინაიდან შრომითი უფლებების, მაგალითად, შვებულებით სარგებლობის, ზეგანაკვეთური მუშაობის შემდეგ საკმარისი დასვენებისა და სხვა, უგულებელყოფა მშრომელთა ფიზიკურ გადაღლას იწვევს და ფატალურ შედეგებთან პირდაპირ კავშირშია. 

• 2021 წელს მშენებლობა ინსპექტირების პრიორიტეტული სფერო იყო, დაშავებულთა და გარდაცვლილთა რიცხვი შემცირდა, მაგრამ კვლავ მაღალია;
• გამოვლენილი დარღვევები აჩვენებს, რომ სამუშაო ადგილზე უსაფრთხოების რისკების შეფასებას, ინდივიდუალური დაცვის საშუალებებსა და სიმაღლეზე მუშაობის სტანდარტების დაცვას სათანადო ყურადღება არ ეთმობა.
• ამის ერთ-ერთ მიზეზად შეიძლება მივიჩნიოთ არასაკმარისი რესურსებით გამოწვეული პრევენციული ღონისძიებების სიმცირეც.

უფრო კონკრეტულად:

• 2020 წლის მსგავსად, 2021 წელს ინსპექტორთა საშტატო ერთეულები ვაკანტური იყო; 
• 2020-2021 წლებში არსებული ადამიანური და ფინანსური რესურსების დიდი ნაწილი კოვიდრეგულაციების კონტროლზე დაიხარჯა. 

შედეგად, 

• 2021 წელს 13 ფატალური შემთხვევა თავიდან ვერ ავიცილეთ, 2022 წელს კი მშენებლობაზე გარდაცვალების შემთხვევა კვლავ დაფიქსირდა. 

მნიშვნელოვანია, რომ გაიზარდოს სამსახურის რესურსები, რათა მან:

• გააძლიეროს პრევენციული ღონისძიებები;
• გაზარდოს მშენებლობაზე არაგეგმური ინსპექტირების რაოდენობა;
• გამოიკვეთოს სანქციების გაზრდის საჭიროება უსაფრთხოების ნორმების დარღვევაზე და 
• იმუშაოს ამ მიმართულებით საინფორმაციო კამპანიებზე, რაც კანონით მისი პირდაპირი მოვალეობაა. 

რა არის საჭირო შრომის ინსპექციის ეფექტიანი მუშაობისთვის შრომის საერთაშორისო ორგანიზაციის სტანდარტების მიხედვით?

• შრომის ინსპექტორთა საკმარისი რაოდენობა სამუშაო ადგილის მოცულობის, საქმიანობის ბუნების და იქ დასაქმებულთა ოდენობის გათვალისწინებით;
• ინსპექტორთა საკმარისი ადმინისტრაციული და ფინანსური რესურსებით უზრუნველყოფა. ეს შეიძლება იყოს: სათანადოდ აღჭურვილი ადგილობრივი ოფისები, ტრანსპორტი, სამსახურებრივ მოვალეობასთან დაკავშირებული სხვა ხარჯების ანაზღაურება და სხვა.