რა არის პრობლემა?

საქართველოს საჯარო უნივერსიტეტების თითქმის ნახევარი და კერძო უნივერსიტეტების ნახევარზე მეტი თბილისშია.

სტუდენტური საცხოვრებელი თბილისში მხოლოდ ერთ საჯარო უნივერსიტეტს აქვს - თბილისის სახელმწიფო უნივერსიტეტს - და ის ორ შენობას მოიცავს.

• ბაგების სტუდენტურ საცხოვრებელში არ არის ადეკვატური საცხოვრებელი პირობები, რადგან ის ძველი და ავარიულია;
• ლისის საერთო საცხოვრებელი გათვლილია 300 სტუდენტზე, რომელთა დიდი ნაწილიც უცხოელი სტუდენტია.

2016 წელს ლისის საერთო საცხოვრებელში ცხოვრებისთვის განაცხადი 10 000-მა სტუდენტმა შეავსო, რაც კიდევ ერთხელ წარმოაჩენს სტუდენტური საცხოვრებლის საჭიროებას.

რა უნდა ვიცოდეთ?

• თბილისის სახელმწიფო უნივერსიტეტის ბაგების საერთო საცხოვრებელი 1975 წელს აშენდა, იგი 3 000 სტუდენტზე იყო გათვლილი. თუმცა, სახელმწიფოში მომხდარი მძიმე სოციო-ეკონომიკური თუ პოლიტიკური მოვლენებიდან გამომდინარე, ამ შენობებში, რომლებიც ახლა უკვე ავარიულია, დევნილები შეასახლეს;
• შედეგად, აქ სტუდენტებისთვის მხოლოდ 396 ადგილია დარჩენილი; 

ამ ეტაპზე, საუბარი დაწყებულია 3000 ადგილიან სტუდენტური საცხოვრებლის მშენებლობაზე, თუმცა პანდემიის პერიოდში ინვესტორი ვერ მოიძებნა, პანდემიის შემდეგ კი ახალი გადაწყვეტილება არ გამოქვეყნებულა. ახლა სტუდენტებს ისღა დარჩენიათ: 

• საცხოვრებელი ან თბილისში მცხოვრებ ნათესავებთან და ახლობლებთან ეძებონ,
• ან გადაიხადონ ბინის ქირა, რომელიც ბევრად აღემატება სტუდენტური საცხოვრებლის ტარიფებს.

რიცხვებში:

• „ევროსტუდენტის“ კვლევის მიხედვით, 26 ქვეყნიდან საქართველოში ყველაზე მაღალია (35%) იმ სტუდენტების წილი,  რომლებიც ფიქრობენ, რომ ძალიან სერიოზული ფინანსური სირთულეების წინაშე დგანან;
• ამავე კვლევის მიხედვით, საქართველოში სტუდენტების 34%-ის შემოსავლების ნახევარზე მეტი ხმარდება საცხოვრებელ ხარჯებს;
• სტუდენტების 48% მუშაობს იმისთვის, რომ დაფაროს საცხოვრებელი ხარჯები;
• სტუდენტების საშუალო თვიური შემოსავალი 506 ლარია, ხოლო ბინის ქირის ფასი თბილისში 2022 წლის ივლისში, წინა წლის ანალოგიურ პერიოდთან შედარებით 50%-ით გაიზარდა და საშუალოდ კვ.მ-ზე 8 დოლარს შეადგენს.